KISAH DALAM BAHASA PAHULUAN (by: Muhammad Mas Adi Yanoor - Barabai)

KISAH DALAM BAHASA PAHULUAN (by: Muhammad Mas Adi Yanoor - Barabai)

Naya kisah bibinian bujang, urangnya liwar bungas, lawan sugih ha pulang.

Amasnya barundun wan pakaiannya nang larang-larang.

Amun urusan babingking, bah.. jangan ditakunakan, dasar harat banar tu pang.

Awaknya mungkal wan pakakas saraba kancang.

Balang awaknya putih nang kacam susu cap biruang.

Rambutnya bahabang-habang nang kacam rambut jagung bajarang.

Kukunya lantik wan panjang nang kacam kuku halang.

Bibirnya habang nang kacam urang imbah manginang.

Tulis kaningnya bacalingkuk nang kacam kumpang parang.

Amun inya bajalan bisa maulah lalakian tatilantang.

Kita sambat haja ngarannya si "Aluh Bintang".

Amun diitihi sakilaran, si Aluh naya asa kadada wawadaannya tu pang.

Tagal imbah diitihi bahimat, sakalinya ada haja nang kurang.

Di atas tulis kaning subalah kiwa, ada tanda suklat pinda hirang.

Ganalnya nang kaya binggul duit jaman japang.

Maraga tanda ninih... maulah inya kada tapi nahap amun batamuan lawan urang.

Tuhuk hudah inya batatamba ka situ ka mari, tatap haja tanda nituh kada mau lingkah wan hilang.

Sampai ahirnya inya baubat anu duktur urang Halabiyu nang baparaktik di Pantai Hambawang.

#######

Babaya masuk ka wadah duktur paraktik, Aluh Bintang langsung manyurung pandir : "ulun ni kada garing.. duk ai. Ulun ka siya handak minta pariksaakan salajur minta ubatiakan tanda nang ada di muha ulun ninih.. panyakit napa kikira ninih ???".
Duktur langsung mamariksa tanda di muha si Aluh. Tuntung mamariksa duktur bingung, lantaran kada taulih panyakitnya.
Sakali lagi duktur mamariksa, tatap haja kada ulihan panyakitnya. Duktur tambah bingung.
Sambil bagaru kapala, duktur kaingatan lawan kasai sangkadi sisa pasin sumalam. Sidin palit sadikit lawan jariji, imbah itu sidin andak jariji sidin tadi di higa tanda suklat nang ada di muha si Aluh.
Takuringis muha si Aluh lawan kujul-kujul inya maariti sakit.

"Hudah... !!!"
"Tahu ai aku hudah panyakitnya" ujah duktur lihum sambil malap bakas kasai di jariji sidin.
"Basuntikkah.. duk ???" Aluh Bintang manantang.
"Kada usah gin.. panyakit ikam tu panyakit biasa haja" ujah duktur manyahut.
Dalam hati Aluh Bintang : "pina cakah dukturnya.. mamadahakan panyakitku ninih panyakit biasa haja. Padahal aku ni hudah sampai ka jajakarta situ batatamba.. kadada nang hingkatnya lagi maampihakan".

"Ikam kubari risip haja gin.. tagal ubatnya ninih larang.. bisa labih sajuta haraganya" ujah duktur, masih lihum sambil manulis risip.
"Ayuha kada papa.. duk ai. Jangankan sajuta, pitung juta gin tatap ulun tukar" ujah Aluh Bintang manyahut tagas jubung.

*******
Aluh Bintang manjulung karatas risip anu tukang jaga aputik, lalu inya duduk mangitik di pancung bangku sambil mangulai hp mahadang ngarannya di kiyau urang.

Kada lawas....
"Aluh Bintang !!!" ujah tukang jaga aputik mangiyau.
"Yaa..." Aluh manyahut, baancap inya manukui tukang jaga aputik.
Tuntung bababayar, Aluh takijat maitihi pasanan ubatnya, 3 kardus ganal banyaknya. Saban buting kardus batulisan...
"DIMANDIKAN 3 X SEHARI".
Aluh Bintang maanyaki tatakunan lawan tukang jaga aputik, tatap haja dijawab :
"Inggih... sasuai tulisan di risip.. nintuh pang hudah ubat pian".

Sampai di rumah, Aluh Bintang langsung mambukai kardus ubatnya. U u u.. sakalinya "OBAT KURAP CAP 19 isinya".
Marasa asa dihulut-hulut ulih duktur, Aluh Bintang langsung badadas mandatangi rumah duktur handak manakunakan parihal panyakitnya.
Duktur manjalasakan :
"Tanda nang ada di muha ikam tu lain panyakit".
"Ai... imbah pang nang mana panyakitnya.. duk ???" Ujah Aluh batakun, angkuh basasarik.
Duktur manjawab : "Awak ikam nang putih tu nah.. Luh ai... Itu PANAU SAAWAKAN".
*******
Wassalam