Kisah gasan mandarasi kuyaan awan tulisan basa warisan Paninian
Kisah Macan II
Gatah rapun kayu hutan nang tatandak amun lawas di hija akan bisa mangaras saurangnya, mahirip kaya bungkah batu. Balang gin bahurup manjadi coklat kahirangan. Pamugaan manjadi damar magin lawas jadi kamayan. Amun urang bahari banyak kagunaannya, damini tih baguna ai jua tagal pabila parlu haja ah.!
Badua badangsanak lalaki anak yatim piatu di Desa Batang Kulur, Kandangan.Umur baluman manjangkau ka tiga puluhan magun bujangan. Gawian mancari gatah kamayan tutih pang sambil batatanaman hagan pamakan saurang.
“Esuk papagian kita kana kahutanan pulang ding ai, gilir nih mau haja sako mandua-talu hari hanyar kita bulikan bacara banyak pang tampahan urang, diikam siapakan dahulu sangu napa nang patut lah.” Ujar si abang mamadahi kanu nang ading.
Imbah talah sarabanya pasiapan, badua badangsanak bamula ma atur langkah manuju kadalam hutanan. Handak mandapati damar nang harat jangan disambat gawian rengan amun kada kana lawan lorongnya mauhaja hampai ka panangahan hutanan hanyar tapampah. Walau tapaksa maranjah sagala dugaan lamun panghidupan tatap di salajurakan, nang badua baading nia dasar cangkal urangnya walau nyawa nang jadi taruhan anggaran babulik wan tangan puang cakada rigi am jar. Syabas Banjar saja pawanian!
Mandua hari maning hudah nang badua ba ading tutih dalam parut hutanan, alhamdulillah tukuhnya banyak jua pakulih tagal baluman mayu haja lagi hagan mahibakakan pintaan tampahan. Ari mamulae landung ka patang …….Rahatan nang badua badangsanak nyanyat manyungkali damar, hujan hangat basadinan turun malapai bumi. Magin lawas sasain labat. Kabujuran kada jauh tumatan di situ tih mambangal sabatang rapun kayu nang hudah rabah pangkal nya sing ganalan mangahap bilang bapupuluh dapa. Badadas si badua baading maampahi, bah sapala banar mamarakani satumbang badiri tingginya wan muha bumi pangkal rapun kayu rabah nintu tih, lapang asa bagana di dalam guha.
“Syukur alhamdulillah……….nia pang rumah kita hagan malam nih ding ai” ucap si abang tanda himung.
Sanja balabuh, hujan magunai pina mariak purintisan. Si badua ba ading hanyar haja imbah mamakani sangu pupuluran, malam hirang mangadap, badua badangsanak barabahan malunjurakan pangawak imbah kapanatan siang tih napa. Rahatan nang badua badangsanak malayang fikiran papasing nya…………………..laluan tadangar bunyi siwara ungah kaya urang tangah bagaya laki binian. Shasss !! utau si abang tanda mamatiakan diri sambil manalinga.
“Asa lawas jua hudah kita kada marasani daging manusia leh bang. Umai caka taulihi wayah hujan-hujan kadamia nyamannya ai.” Harungut si bini bapadah ka nang laki pina mangidam ha tukuhnya.
“Sabar ha Yang ai……….mun damintu esuk ai kita tulakan bagarit ka kampung, manusia nia matan banyak banar nang bungul-bungul, kita pintari tantu banar ah tapakulih.” Sahut si laki bunyi garau ha siwara.
“Banaran ai napa ujar andika tuh ………….tagal pariannya bubuhan manusia tuh manahu asal katurunan kita …….labaram hancur kita bang ai” sambut si bini tih pulang.
“Nang sabujurannya Yang ai diaku laginai kalumpanan am kaya apa bunyi sambatan ayat kapantangan kita tutih.” Balas si laki.
“Amun sawat andika gin kada ingat manusia pulang am maka tahu” jawab si bini arai.
“Diikam ingat lah pina kaya apa bunyi nya ayat hintutih ca padahakan kadiaku nah” jar si laki mahimati.
“Cah cakada hakun ai……..busia lah ada manusia nang mandangar makalahanam…….cagar bakatumbahan pang sawargaan katurunan kita dudi” ujar si bini manaha akan.
“Dimanang ada manusia dalam hutanan tabal kadamia napang dijalak kasia………….Ayuha batampai mun kada ku pukah-pukah urat tulangnya ………alamat taburarai pang paparutan …..sia nah”. Hingkau si lagi garigitan wan cacakah nya palian………..si tua banar!!
Si badua badangsanak di bawah pangkal kayu rabah matan hinip cakada wani bakariwit barang sahama, mun tasalah hitung cilaka pang diri. Manalinga papasingnya maharap mudahan ayat kapantangan si macan la anat tuh lakas taungkai.
“Napa jua nang ditakutanakan lagi Yang, lakasi am padahakan dimapa garang bunyi ayat kapantangan kita tutih asa kada sabar lagi diaku nih” si laki macan batagihan.
“Hei yaai……..takutannya aku ai” Harungut si bini gusar. Si laki macan tatap mandasak kanu nang bini pinta padahakan jua mun tida tahu tuh kayina napa akibatnya jar. Malihat kalakuan laki nang pina bamula maraju…….. Ayungannya si bini tapaksa baalah………….
“Ayat tuh handap haja……….tagal matan ampuh banar…..jangan andika manyasal dudi jadiam…………….Ayuha dika dangarakan baik-baik lah………..”SANG NGATAK, SANG NGITIK, SANG NGIANG MAHARAJA DI PATI……..Tutu pang asal katurunan kita bang ai…………puas am hati andika kalu lah”. Sindir si bini.
“Sang ngatak, sang ngitik, sang ngiang maharaja di pati………….hehehe,” ulang silaki macan sambil tatawa kahimungan.
Nang badua baading di bawah banir kayu papasing nya ma apal ayat kapantangan macan tutih. Sakali nih tahu tuh untung nasib diikam wahai macan la anat ai, nang katuju banar mangipung daging manusia …………..jar hati si abang pancari damar. Imbahnya napangada ah bujur sa malaman maning badudua kada wani taguring barang sakirip, macan laki binian nang di atas batang kayu tutih maka am karuh-karuhan kajanakan guring.
Bunyi Pilanduk dahan (warik, ungka) hangkui basasahutan………….mananda akan ari bamula siang. Karuh si macan laki binian magun ham mandingus rahatan diayun mimpi rami kalu ah, kada sadar buntut panjang bajuntaian baampah ka bawah. Bagigimit si nang badua baading manyimpai tali rotan laluan maikat buntut si macan saurang sabuting ka akar kayu rabah tutih. Bah, harat simpaian mun kada ba astillah cakada nyanyamanan mamacul saku. Sabalum baisur, walau dimapagin si pancari damar badua ba ading harus mauji dahulu kaya apa kaampuhan ayat nang hudah diapal samalaman tadih, tida cakada banjar ngarannya………hehehe!
Si abang pancari damar manjuhut sabatang buluh basadinan manguar ka awak si macal sambil mahingkau
“Hooi !!!, lakasi bagun. Ari siang hudah nih…..mun talalu malandau pa kada parajakian!!” Napangada ah pada bakumbah am si Macan dua laki bini katakajutan. Dua ikung macan babalang tiga saling ganalan mangaum sing hangkuian mampiulah tumbar sarabanya mahluk nang ada intang situ tih, tanda kasarikan, basiap cagar badaing lawan manusia nang wani banar mancabar kahandalan panghulu sagala macan di Nusantara. Hampai am hudah wayah wan kutikanya nih…………fakir si abang pancari damar laluan mambaca manderam………
“Bismillahirahmanirahim…………Sang Ngatak, Sang Ngitik, Sang Ngiang Maharaja Di Pati…………Asal katurunan diikam macan la anat ai.” Macan laki binian nang magun batingir di atas batang kayu basadinan bahalimpaur, batandik katakutanan. Si ading pancari damar maulangi kalimat ayat kapantangan macan. Napa lagi am, dua ikung macan nang hudah kada katahanan. Bis..........., batimbai ka tanah, mandua talo kali hudah batungkis handak bukahan cakada baupaya, napang mun ikatan simpaian buntut sasain pisit malilit di akar kayu. Kalimat ayat macan diulangi lagi leh nang badua badangsanak…………….Angkara talalu bahimat bahintatak………… ayungan nya tabarubut buntut ……macan laki binian nang hudah kada sing buntutan bukahan mamicak tuli garu-garungan pinda kasakitan ya amat langsung langlam di talan parut hutanan.
Badua badangsanak lihum bapair tanda puas hati, dua untai buntut panjang paninggalan macan di bawa bulik ka Desa hagan ganangan. Damintu lah kahandak Tuhan satiap mahluk nang dijadi akan tantu ada kalabihan lawan kakurangannya adil saksama napa. Mun tida bilang bamaharaja lela pang bubuahan macan mambinasa ka manusia hampai ka ahir zaman
Pasan ulun kanu bubuhan…………..walau pun kita nia jauh tumatan banua lamun ayat tutih simpani sabaiknya dalam lipatan ingatan sabarataan, jangan dipamainakan atanapi diulah huhulutan. Parian ada jua bubuhan nang kada pati tarukui wan kisah ulun tutih atanapi hudah tadayau ilmu nang harat-harat sarana ah diwada dikuya di sia lah. Kada tahu ham dudi kaluku ada nang bahijrah/bagawian ka Malaysia Timur Sarawak khasnya. Ba i’ingat lah, hutanan Borneo pa nargi macan saumbunan, amun nang lalakian tasalah hitungan kaluku ah pagat batang bajuntai, pasalnya si Maharaja Di Pati dasar katuju banar awan nang andeh kita tuh……………..Rasanya………….Anissss (manis) napa ujar……………..Hehehe !!
Barilaan Sabarataan
Comments
Post a Comment