Kisah Bahasa Banjar tulis Angah Samsi Amri Paguruan Silat Kuntau Banjar

Kisah Kita arini gasan mandarasi basa paninian nang hudah sasain langlam di nusantara.....

Manggisit

Mamparuput bunyi exhaust kapompong vespa super si Utoh Aban bamandak pabila tatireng kami nang rahat garunuman di wadah pa unjunan sapat ninto tih, mambari muar banar si juhara dali nang saikung nia.

“Mambade ku carie di kelab MCA cakada tapampah, di Bukit Songo kada baumbayang, kali nya aur balapakan di sia haja pang……cilakoi banar!!” Hingkau si utoh Aban pina gagarah kataman, himung.

“Ai, napa garang nang pina bahimat banar bacarie kami tih, tahutang kada, tapasihol lawan diikam gin kada, napa lagi” Sahut si Usop mahimati.

“Umai kada kalakon tuh ah dangsanak badudua ai………ada kiraan nih nang matannya tih.” Ujar si utoh Aban sambil mamaraki kami. Nah nia cakada lain kiraan gawian nang kada mangaruan pang pulang, siapang nang kada pinandu lawan si Aban nia cakada kakurang kiraan, tagal bilang lucong tantan takacak bigi waloh haja ah…….jar hati.

“Damia dangsanak badudua ai!!” si Utoh Aban manyalajurakan kiraan.

Di pinjung Kg.T.M nang basubakahan awan Sg.Bernam Estate ada sabigi rumah ganal lawas ulahan wayah British bahari, kukuh wan harat jua kayu nya malaran. Maumpati kisah nang tutuhanya. Rumah ninto tih ampunya urang sugih nang datang tumatan di nargi subarang (Pulau Jawa, Indon). Angkara kada pati katuju bagana parak urang lain pada kula warganya, tuto pang lagit rumah tutih diulah jauh ka panangahan kabun nyiur. Sambil mausaha akan kabun nyiur warga ninto tih baniaga barang hiasan bibinian amas, intan barlian nang di bawa tumatan di Indonesia. Para tukari bubuhan urang sugih nang bagana sautaran Silangor wan Perak. Pabila malatui Perang Dunia ka-2, banyak lah bubuhan warga tutih nang kada kawa babulik lagi ka sia (Malaya), ada nang hudah maninggal wan sarabanya ham kalo. Laluan tatinggal pawaris tunggal dua laki bini di rumah ganal ninto tih. Lamun kaya itu, lawas hudah kawin tagal kada baulihi anak saikung-ikung, kada maangkah pulang manjalanakan paniagaan kaya warga nya nang lain, katahu aur bakabun nyiur tuto pang. Napangada ah pada taparam am sagala amas, intan barlian, Japun pulang mamarintah Malaya, hancur lanah am Kota Warigin, barang kada jadi duit.

Tahun 1970 an, takdir manantuakan, si laki bulik manyahut kiyauan Ilahi, maka tatinggal am si bini manyaurangan umur sasain lanjut, warga di Indo hinip. Di dangar habar bilang barara hudah bubuhan panyuntan, panyamun manarai mangakasi rumah ganal tutih bacaraian amas, intan barlian lamun sikung kada nang bahasilnya ujar!

“Hudah ku rauni dangsanakai……..amun malam si nang tuha tuh kada guring di rumah tuh kada am, umpat bamalam di rumah jiran, ujur napa……….kadada nang cagar di mawahakan, imbah kita gulagai sahadanya ranai.” Ujar Aban mahimati cakah. Cakada nang manusia haja jadi pangana duniya nih Ban ai, bamacam lagi mahluk dijadiakan Tuhan hagan ada habuan papasingnya.

“Ayuha nah kita cubae Sam ai, kalo aii bapakulih………malaran” jar si Usop, bamula hudah tapangaruh lawan kiraan si Utoh Aban cilakoi banar!

Bilang manalo kali limau nipis babalah nang hudah dimanderam hingganya aur tatilungkup tantan, mananda akan banyak pang pasiholnya kayina ni nih. Gasak......., angkara handak manjaga hati kakawanan ayuha tapaksa ai ku turutakan, napa jua balanya nang kana ditampuh tanggung ha dudi. Soal bahasil atawa kada, paampihan pang gilir nih.Jar hati!

“Kita tulaki patang esuk dangsanak badudua ai.” Hingkau diako basumangat kanu nang badua ninto tih, pada hal di hati Tuhan haja nang tahunya, gawian gilir nih tantu banar ah sia-sia haja.

“Ya daminto, nia hanyar kawan sajati ngarannya.” Sahut si Aban kahimungan sambil manapuk ka bahu ku, lihum bapair si Usop jua tanda batarukuian napa. Bukit banar!!

Kurang labih jam 5.30 patang, kami batiga mamulae bakaraut maranduk kabun nyiur di pinggir Estate Sg.Bernam, maampahi ka rumah ganal di Kg.T.B tasambat. Pahimatan diako ka gawian nang kada sampuraka nia tinggal 30/70 jua am, tasalah langkah alamat mancilaka pang kasudahannya. Si Utoh Aban nang ampun kiraan maka am bilang badadas bajalan pina kada sabar lagi kahandakan lakas mangulagai rumah lawas tutih, cakada mamikirakan kasalamatan sahama-hama……….Bringsit!

Tapat kutika maghrib kami sampai intang kawasan rumah ninto tih. Basanjaan maning, nyamuk mandarung kada ka tapakan……sakulilingan rumah bilang mamapak di tumbuhi rapun kayu badaun ramba asa bamula pina lain hudah pangrasa. Cuma bulu awak nang balum mamburinjing, bah marma!

“Napa am Sam, kita mulae nah” ujar si Aban gagarah kataman.

“His……talahakan maghrib dahulu Ban ai, ari gin kada kadap banar lagi nih, hadangi satutumat lagi.” sahut diako manangati.

“Cah napang di hadang ,kadada manusia nya juaha ,sarana taat banar ah lawan ilmu di ikam tuh.” Kuya si Aban sasain takabur, si Usop mandam kada sing bunyian napa kah sako nang rahat di pikirakan.

“Ayuha suka di ikam lah Ban ai, ulah kaya rumah saurang, napa pang.” Hingkau diako bamula asa garigitan.

Aban wan Usop bakayakat manaiki palatar, manarai manju’ung ka lawang, pisit basunduk tumat di dalam cakada kawa di paparigal. Aku magun ham tajugut badiri di muhara tangga.

“Kada hingkat dibuka Sam ai, basunduk tumatan di dalam, bapala banar nia.” Harungut si Aban kanu diako.

“Ayuam kita itihi lawang nang panangahan pulang dimapa tih, kaluko ai hingkat dikira akan.” Ujar si Usop manahapi.

“Umai ganalnya kapiting, kunci bahari kala nia, hangkui tih pariannya ditutui sako, cakada magan, kadangaran urang cagar bamandahan pang kita” jar Usop sambil manguliming ka kunci tutih. Si utoh Aban basaing kukulilik maitihi lulungkang higa mahiga, ayungannya lacit taka sarambi, dasar pisit rumah urang nia, kadada jalan nang cagar dinanaiki. Usop mandam taduduk di tangga bamula pina putus harap hudah. Mambari maras di lihat.

“Bismilahirahmanirahim………………………..Bur sakata……………………..Nurila sakata………….kunci taandak………………..sakununglah…………………lakasi tabuka!!” Diako batawakal sambil mambaca manderam. Si Usop wan Aban magunai kalimpusutan papasingnya kada karuan rasa. Kalimat manderam ku ulangi baasa, lamun kapiting magun kada apa-apa. Kada di sangka ……..kalimat nang katujuh, manciplak kunci saurangan tabuka, hudah di izinakan aleh nang esa. Alhamdulillah!

Si Utoh Aban nang ampun kiraan bilang batandik kasukaan, si Usop dintu jua………….situa banar! Mangariut am bunyi lawang di ju’ung aleh nang badua, dalam rumah mangadap kaya dalam guha.

Pahadangan Usop wan Aban auran mangulagai dalam kamar panangahan, diako manyaurangan mambukae lulungkang di anjung muhara rumah, di luar cahaya bulan salau-salauan, bunyi tantaguk bamula sahut-sahutan, lulungkang singhaja ku buka, kada napa, apa ah……..baingat…….. hagan kasalamatan!

Bah, bunyi galabauan si Aban wan Usop mangakasi sarabanya nang ada di dalam kamar panangahan tutih, habis tabulangkir sahadanya, tahuam, baluman tapampah sako sagala nang di hajati ……hija akan haja.

Rumah ganal ampat bilik kaliatan kada pati taharagu, hibak wan sarang gandang lawa, kalalawar bahanu mantipur tarabangan, walau dimapa gin lantai wan diding magunai kukuh ulahan kayu harat napa. Diako bagimit mamasuki kamar di hadap, sabuah ranjang wasi siap bakalambu, nia pang sako paguringan nang tuha tuh atanapi wadah barihat hidin, dilihat tukoh pina barasih haja pang. Ku hindaue wan suar dimarata pinjung, sabuting lamari ganal laluan ku buka……..poh mahibak isinya lawan pakaian bahari, mayu asanya mun cagar baulah pilem wayang kisah 50an. Bilang lilip ku ugai, canangan intan berlian, saganal janggut hundang amas cakadada tapampah. Dibawah ranjang ku janguk jua, sabuting kampil ganal kulit ulahan zaman British pina mangapap, babaya di buka bagabal isinya wan duit Japon bagambar rapun pisang batandanan, cakanya nilai Yen damini alamat basugihan pang, mau sako bubuhan kada pinandu awan jutawan si Nilasakunta……Hehehehee!

Babaya imbah haja mangulagai isi kampil tutih……………………………bulu awak hudah bamula asa disap-disap balajuran maburinjing………….……ada nang kada ruhui ni nih….jar hati. Aku kaluar tumatan dalam bilik, sawat manoleh baampah ka sarambi……………..…labaram, tababar basadinan sumangat pabila ta tiring saikung lambaga bapakaian saraba putih ilah bibinian rahat batalakung, sasain bakaraut maampahi anjung…..sapa garang si ampun rumah kah nih? Si talakung putih bamandak manjanguk intang kamar pamugan nang hudah hambur tauran marga digawi si Aban wan Usop. Batis bajajak bamula asa baambul, hinak sasain maancap, bala nangapa kuang nia, si talakung putih manatar maampahi diako, taka taki magunai kada tajawap manusia atawa hantu? Kain talakung pinda malarak di dada si lambaga mananda akan kadua balah tangan rahatan di angkat babujur ka hadap, mau haja cagar mambinasa. Pariannya bujur hantu alamat bakatumbahan, cakada ma angkah di si silati nang kadamia. Suar nang magun batatingan basadinan ku likit, cahaya suar tapat baampah ka muha si lambaga………………

Uuughhhh!! Matan mambari takutan……………Mata mancurung habang kaya bigi saga,manyaringai muntung ma arai akan taring……………Asatagafirullah al azim……Cilaka 13, hantu banaran nia……cakada magan di hadang. Napa lagi am imbah batabus ka tanah tumatan lulungkang, cakada tahu asa mahingal ai, angaran pukah puhon gulo cakada rigi am, mati mudar bubuhan ai!!

Hudah mahingal marga batimbai ka tanah, hanyar kaganangan nasib badua dangsanak maling nang magun baluman bakatuntungan bakakasi sarabanya dalam kamar subalah di atas rumah, kada tahu pada bala rahatan bahadangan. Kada ……..kada…….kada Banjar bapahatian wadi sambatannya mun maninggalakan bukah ka kawan, maraha…….wani mampiulah, wani jua sasamaan mananggung, ayuha, pariannya tadalak gilir nih aku rila haja. Aku sawat mangapal sagangam tanah di halaman rumah tasambat.

“Bismillahirahmanirahim…………. Allahulaillah…………………… mutallah……………………bajauh diikam…………aku tahu asal kajadian ikam…………………Banyu…………….tumatan………….lakasi bukah ka raja di ikam…………………………………bulik ka tuan ikam……………………atanapi lanah………………dimurkae Allah!!”

Sambil baganggaman sakacakan tanah nang hudah di manderam, diako basabil awan kayakinan naik karumah tumatan lawang panangahan. Si hantu hudah tacugut di muhara lawang bilik wadah si Aban wan Usop mahadang kutika sako cagar mambinasa.

“Allahuakbarrrrr……………….nah ambil habuan ikam!!” Hintatak ku sambil manawak tanah bajampi ka ampah si hantu. Si Aban wan Usop takipik katakajutan. Lambaga hantu basadinan hilang pada panglihat.

“Ban, Usop……. lakasi tinggalakan rumah puaka nih, kita kasaraan!!!!”

“Ai, napa garang ada urang ah?” Sawat haja lagi batakun ka diako, mambari muar banar si Aban nia.
“Ayo lakasi sarana banyak takunan” sahut ku handap. Gadabusan am tiga ikung si maling kundang batabus ka halaman. Si hantu talakung hudaham mancugut bahadangan di muhara tangga.

“Hanttuuuuuu…..Hoh….hoooh….hohohh.” Bunyi mangalatar siwara Aban katakutanan pabila tatiring si hantu ninto tih. Usop ranai tabungkam, bunyi hinak ganal jua nang tara kadangaran. Si hantu sasain barapat, tapih talakung pina kada mahayut bumi, maawangan, cakada magan di umba’ani matan mancilaka banaran nia.

“Bukahannnnnnnn!!!” kuriak ku sing hangkuian. Duga baduhara maninggalakan bukah siapang lagi amun kada si Aban urangnya, mancicing pandahuluan, bukit banar!

Batalo pasarta larian mancinit 150 meter ayungannya hampai ka garisan panamat, pinggir parit ganal paranggan antara Kg.T/M awan Sg.Bernam Estate. Babaya dituleh ka balakang………. Ya Allah…si hantu sasain barapat, tangan kakancawai kaya handak maitok, si utoh Aban bilang parak takamih katakutanan, Usop kada sing garakan pasrah, tukohnya. Saat kutika magin manganting………cakada sawatan handak mambaca manderam…………….. Imbah burrrrr diako batajun ka dalam parit ganal, Usop dinto jua, cabau si Aban pulang batimbai ……..

“Adoooooiiiii!!” Harungut si Usop mangusur kasakitan napang mun talinga asa pacul marga tatindihi aleh si Aban. Mandakannya banyu di parit tutih kada dalam banar, kami bakayukut manaiki tabing pinggir estate. Si hantu talakung magunai mancugut arai di subarang parit maitihi kalakuan kami, cakanya manusia maupang gagalahak mawarahakan sako…….bangsat banar!!

Usop magunai aur sapusuh-pusuh ka talinga. Cah, cakada awahan timbil lagi Sop ai!! Kami hudah salamat manjajak bumi Sg.Bernam Estate. Si hantu batalakung magunai bacugutan. Nah…….aku hudah hingkat manangguh………..hantu nia cakada lain pada sahabat si ampun rumah nang di rampingi tumatan turun tamurun hagan manjagae harta tuan nya,mambadae di inya kada baupaya manyubarangi kami, di luar kawasan jagaannya napa. Baarti kasalamatan talo ikung si maling kundang agak tajamin. Walau dimapa gin amun manurut ujar Paguruan, hantu ingunan nang kadamia dasar banaran bisa maintok, mamukah, mambinasa banaran. Tuto pang sako tumatan lagi bahari hampai taka kami tutih kadada saikung-ikung maling nang bapakulih manyuntani sarabanya harta dalam rumah ganal…… tasambat.

Si utoh Aban mangatar saawakan, mau haja sako hudah takamih dalam silawar nang bacamuang jimus wan licak katakutanan. Usop ranai mambisu tapikir sako, nia pang akibatnya, amun talalo manurutakan pahatian, kada pama asian ……manggisit batandu papasingnya………….. Apus muha! Wayah bakaraut bulikan si Aban matan mamai, bajalan gin bilang bahampang, barapa kali hudah aur nanar katakajutan. Rapun pisang nang rahat balenggang ditampur angin laginai di sangka hantu. Sasain kada bamaya lagi…………labaram hancat dangsanak nang saikung nia…..jar hati.

Mamarakani mamukul 1.00 pagi hanyar lacit taka rumah, papasingnya taampar lumpi. Pangawak si utoh Aban bamula pina mariap dingin, siwara ra’ at. Usop kada janak guring, bahanu maigau ilah urang katakajutan. Akibat badating lawan hantu talakung……………si utoh Aban manalo hari hudah garing hangat, saban malam aur kaganangan hantu haja. Bilang batuhuk hudah nang kawitan mahimati napa kuang puncanya lagit kadamia. Mandakannya sidin baranai haja kada sing padahan, amun pariannya pacah lubang alamat taka diako pang pulang ka tunggalannya, pada hal kiraan siapa garang nang babawaan baulah gawian kada sampuraka ninto tih. Si utoh Nusi maka am bauntung saban malam bailangi larangan sidin si Kamsiah ading aleh si Aban tutih, bapiragah mailangi si garing jar, pada hal sakira nyaman baitihan wan bakal bini saurang jua ai……………..lagi mambari muar nia!

Samingu waktu balalu, si utoh Aban sigar kaya sarajin, mamparuput baasa am injin vespa umpat mangigiri Kg.T.B. Usop lawan diako magunai saban patang jadi panggana tatap wadah maunjuni sapat rapun hampalam. Asa gair jua amun talalo manjuhara saban malam kaluko di dandam leh bubuhan jawa Jasman pa bamandahan.

“Barapa Sop agak-agak hutang kita katunggalan nya?” Ujah ku manakuni kanu si Usop.

“Amun di kira baastilah bah, parak maanam ratus jua sako Sam ai,” sahut si Usop gusar. Hutang kanu bubuhan ampun kabun nyiur di Kg.T.B. Maambil upah mangawi kabun urang, duit pamugaan di ambil badahulu, imbah tuh gawian manyawar ambun, ditalahakan kada, di ulangi kada, di mapa kada kamuar urang.

“Nang sabujurannya aku handak bapadah kanu diikam nih Sam ai, esuk diako cagar tulak ka Felda, Sg.Koyan maumpati abang ku, jar hidin di sana banyak gawian, tuto pang cagar mancubae nih…….bautung sabut timbul……pariannya tinggalam batu tih..... napa tuh ai….nang tantunya ditarai ai hulu.” Kuya si Usop ilah marista.

“Amun hudah dinto tih, napa pang salajurakan ha Sop ai mudahanai ada razaki diikam kayina ……..malaran,” sahut ku kanu si Usop mambari sumangat.

“Moto buruk tuh ku tinggal kanu diikam Sam ai, pakai haja cakada batangatan, tagal jangan kalumpanan maapiki diri, satro di ganang, anggaran taampar kada sawat malawan matan anggai banar……kada kaitu lah.” Pasan sidin kanu diako.

“Insya Allah dangsanakai………pariannya diikam marikit jadi urang Pahang dudi, jangan kalumpanan lawan diako lah, barilaan kita Duniya Akhirat.” Bah asa marista jua cagar tapisah awan kawan sahati, sama juharanya.

Ganangan Ma udak Jiwa............Barilaan Sabarataan