CARITA BAHASA BANJAR

Assalamualaikum warahmatullah.........selamat siang sahabat FB semua, menjelang libur panjang, semoga kita semua selalu dalam keberkahan Allah SWT. Aamiin Ya Rabbal'alamin. Menemani istirahat siang sahabat FB semua, ulun posting sebuah cerita bahasa Banjar berjudul 'PILANGGUR'. Cerita ini bertutur tentang mitos pilanggur yang ada dipercaya oleh sebagian masyarakat Banjar. semoga cerita ini bermanfaat bagi kita semua.(#DrPamali Ibu Hatmiati Masy'ud)

PILANGGUR

Marianah ci’ir-ci’ir badiri di muhara lawang. Matanya kada sing ampihan tuju ka hulu pinanya ada nang dihadangi.
“Marianah, lakasi masuk, ari sanja hudah!” Tarabang sumangat Marianah, napa mun suara umanya saling hangkuian.
“Lakasi Marianah ai, tu urang bang hudah di balai. Kancingi lulungkang.” Uma Marianah gagarumbu matan juruk. Marianah gadaguian mangantupi lulungkang. Kada saapa kadangaran Uma Marianah bapandir pulang.
“Ikam ni Marianah ai, rancak bangat hudah ditagur, pamali bibinian bujang tu di muhara lawang ari sanja. Kaluku kana pilanggur.” Marianah kadada sing burinikan, hinip lalu tu pang.
***
Malam sasain lindap, babahanu kukulai babunyi, asa mamburinjing burit tundun mandangar. Marianah cagat mata, gulang gulik kada mangaruan, tabingsai ulas tilam, kaingatan wan urang di hujung banua. Kawan sakulah madrasah baari, jar hudah bulik tuntung kuliah di kuta. Lihum Marianah, baari rahat musim batanam, inya tulakan manyiput, bagagayung taulih. Imbah urang mangatam banih inya katuju jua babubukahan di pahumaan, umpat mangapungi kalayangan. Nang rancak imbah bulik sakulah parasauan ka padang tagah mamutiki buah karamunting nang mahabang, bakakantungan taulih. Manis kada sakira, mun karamunting kadada buahnya nang pina masakan, laluai mancarii rapun kalatupan mamilihi buahnya nang kuning babayun. Litus-litus tupang, manis-manis masam, babahanu jua buah balaran nang manguning diputiki. Hin, sakalinya Marianah kaganangan naun ai.
Sapriansyah, kada dinyana-nyana inya tu sakulah tinggi, mun kuitanya urang sakit jua. Tagahipang inya tu dasar banaran pintar, babahanu bila bulikkan sakulah Aliyah di Amuntai, inya karap ai bulik baimbai Marianah. Tagal pas kuliah di Banjar kada suah pang pina tatamu atawa mailangi Marianah. Ajin Sapri kada babulik-bulik jua, napa mun ungkus taksi sing larangan. Malaran kaluku duitnya.
Marianah imbah lulus Aliyah, kada manyambung lagi. Maraganya uma wan abahnya kada baduit sagan ungkus kuliah ka kuta, pancarian bahuma, ngitu gin mangaruni. Mana ading barayam, kayapaam, biar handak gin kuliah, kada purun jua Marianah wan kuitan. Babaya lulus sakulah Aliyah, sing banyakan urang badatang, tagal Marianah kada hiran-hiran. Ingat banar inya pandiran umanya,
“Sakulah hudah tuntung, kada usah pina kaungahan handak kaya urang sakulah batitinggi sagala. Lilihati tu si Idah mana kakaruan di sakulahakan kuitannya, bahujung umanya sing hutang-hutang, sakulah kada tuntung. Hutang maka am batahar.”
Marianah ranai, bujur jua pandiran kuitannya, wan maras jua adingnya, nangaran inya anak panuhanya. Mun dibabandingan inya untungai hudah lulus Aliyah, kakawanannya bilang kadada nang sakulah, Madrasah haja kada lulus.
***
“Anak Julak Masri tu handak badatang, abahnya samalam bapadah handak ka rumah. Kayapa ikam Marianah?” Susubuhan Uma Marianah batakun, harau Marianah taciragal. Untung haja banyu manggurak nang handak dibuatnya ka tarmus kada tabalik. Jaka tida labaram, baluyuhan Marianah, lupau tupang.
Marianah hapal bangat wan Suri anak Julak Masri. Bujur pang urang sugih, tagahipang, nang ngaran Suri tu macal bangat, sakulah kada sing tuntungan, napang mun kada panurun, katuju pamainan ha pulang, rancak tatangkap dah, tagal nang ngaran abahnya sugih, ancapai lapas.
“Sasadangi Umanya ai, katuju banar mamaksa anak. Ikam tahuai luku wan kalakuan Suri nangitu, purun hajalah anak saurang kawin wan ngitu.”
“Kayapa am, rancaknya urang hudah badatang, Marianah kada ilui-ilui jua, asa mambari muar banar.”
“Nah, umanya nangini lah, juduh tu umanya ai urusan Allah Ta’ala, mun hudah tatamu, ada haja tu sasampukannya.”
Uma Marianah kada manyahut, asa garigitan jua sidin wan laki. Katuju kaluku anak disambati urang bujang tuha.
***
“Ikam ni Marianahlah, nangapa garang dihadang, umur saurang tu hudah sasain tuha, kada supan kah. Abahmu maninggal hudah, tatap haja ikam kada balaki-laki. Ading-adingmu balakian dah, kakawananmu gin hudah bacucuan, ikam maka-am, kawin haja baluman.”
Marianah kada kawa baucap lagi, banyu mata haja kikiliran, purunnya umanya manyambat kayaitu. Inya gin handak balaki, mun lalakian nang badatang tu pina kada karuan, kayapa inya hakun, anggaran manyakiti diri. Marianah kaganangan wan abahnya, cakanya sidin hidup kada kayaini luku sakitnya hati, asa marista.
“Isuk tu nah ari Jumahat, kita ka rumah Nini Iwar. Nyaman sidin mamandii ikam.”
Kada jua Marianah baburinik, sangkal inya disuruh mandi, tangaari Jumahat pulang.
“Mandangarlah Marianah?” Umanya batakun, banyaring suara.
“Mandi nangapa garang, Ma?” Marianah bagimit manyahut, napa mun maniring mata umanya ciling-ciling, asa takutan inya.
“Mandi mambuang pilanggur. Kaluku ai ikam takana pilanggur pas ari sanja.”
Marianah manggarunum, ”Pabila jua ulun kaluar sanja.”
“Nah, inya Marianah ai bisa haja pas ikam ada di tanah urang bang di balai, atawa pas ikam kaluar sanja, takana, inya kada bakantuan saban ari atawa rancak, kaluku-kaluku banar ai. Umur maniga puluh labih, urang badatang ada haja, kada jua ilui-ilui hakun balaki.”
“Nangapa garang pilanggur tu, Ma?”
“Nah, Diang nangini lah. Iya ikam kada balaki-laki tu nah kana pilanggur ngarannya.”
***
Tangaari Jumat, babaya urang ka masigitan, uma Marianah badadas mambawai Marianah ka rumah Nini Iwar.
“Nangini kah anakmu?” nini iwar batakun wan umanya Marianah.
“Inggih Ni ai. Marianah ngarannya.”
“Asa kada suah malihat aku lih. Kada panjalanan saku-ai.”
“Kada Ni ai, di rumah haja imbah lulus sakulah.”
“Ih alih. Baganti baju Galuh-ai tu ka kamar, batapih haja. Tapih dibawalah?”
“Ada ai Ni ai, hanyar manukar di pasar.”
“Kambangnya pang? Salangkapnyalah.”
“Inggih,” Uma Marianah maurak isi kantungan pulastik nang dibawa sidin. Sakalinya kambang, lading, baras, tapih, bamacam-macam. Nang kaya urang handak badudus haja.
Marianah tuntung baganti baju, kaluar batapih di dada batutup kakamban habang. Langkar banar.
“Sing bungas ai, anakmu ni Diang i.”
“Iya am Ni ai. Umur hudah maniga puluh, rancak haja urang badatang, kada hakun-hakun jua, siapakah dihadang, kaluku kana pilanggurkah, kana andakkan urangkah.”
“Ayuhaja, kita barasihi, mandi ngini sariat haja, juduh nangitu urusan Allah Ta’ala, jadi rarancaki badu’a haja. Mun imbah mandi ni kada bataha lawas.” Nini Iwar maanu kambang, mambuat ka banyu di jidar, rimut-rimut muntung sidin babacaan.
Marianah duduk di rihal mahadap mataari hidup. Babaya urang bang, tangaari Jumahat, Marianah dikubui sidin mulai kapala. Bahu kanan, bahu kiwa, hitungan ganjil. Kada lapas muntung sidin babacaan. Imbah Marianah dimandi’i sidin, tapih talasan mandi ditawakakan sidin ka atas hatap.
Himung Uma Marianah, maitihi anak sidin dimandii, asa langkar Marianah, pina naik sari. Marianah manggarunum dalam hati, jakanya kada umanya mamaksa kada bataha inya hakun mandi tangaari Jumahat, tagal handak bakti haja wan sidin. Maulah kuitan himung.
***
Malam Arba, parak saminggu imbah Marianah mandi mambuang pilanggur. Pasar malam han. Rami urang tulakan. Darurungan bunyi sapida mutur.
“Ma, Uma!” Marianah mahiyau umanya.
“Nangapang Marinah.” Umanya kaluar matan juruk.
“Anu Ma ai.” Marianah tapaga-paga bapandir.
“Anu nangapa, babujur bapandir. Kuitan kada mandangar, sunging.”
“Ulun pumarian ti, tatamu Umanya Sapri. Sidin jar handak ka rumah kita.”
“Umanya Sapri kawanmu baarikah, nang kurus, tinggi mancuir ngitu.” Uma Marianah batakun.
“Inggih, Ma ai.”
“Jah, nangapa habar? Sapri kawanmu tu kawin luku hudah.”
“Tahu am Ma ai.”
“Pabila jar?”
“Imbah Isa malam ngini jar Ma ai.”
“Mun kayaitu, lakasi ikam basisiap, diampar tikar purun tu nah, imbah ngitu nukar wadai karing, ih, anu haja gin, sanga pisang nurun tu nah, ulah guguduh atawa pisang batilangjang. Pirik bawang putih basanga wan lumbuk pangrawit, buati patis, uyahi, gulai sadikit.” Uma Marianah badadas manjurak tukar purun di atas titiwa. Sidin asa baparasaan, ajin-ai, umanya Sapri handak mandatangankan kula sidin sagan Marianah.
Marianah ka juruk, mangamir galapung wan banyu mambuati uyah sadikit, dipacahinya hintalu hayam hagan maulah guguduh. Pisang nurun dikuyaknya, dihiris mipis-mipis, buat ka kamiran, imbah nangitu, diurak kaya kipas dibuat ka minyak panas, mandisir babunyi. Sapalih pisang nurun dibalah dua sagan manyanga batilanjang.
Kada saapa, urang bang Isa di balai, Uma Marianah pina galugugupan, sidin mangincang tuju ka hulu mancarii dansanak abah Marianah, Uwa Wardi. Sakalinya sidin sumbayangan ka balai, Uma Marianah bapasan haja wan Inur anak Uwa Wardi, pada Uma Marianah manyuruh sidin ka rumah. Babaya imbah Marianah wan umanya baisa, Uwa Wardi datanganan dua laki bini.
“Assalamualaikum. Manaan urangnya pina hinip lalu.”
“Waalaikum salam. Masukan Wa, ni Marianah masih ai sambahyang, manyunat luku. Dudukan Wa.” Uwa Wardi wan bini sidin dudukan di tikar purun nang hudah baampar. Marianah tuntung sambayang manyalami Uwa Wardi, mancium tangan sidin, balalu ka juruk, maulah banyu tih, maangkat guguduh pisang nurun.
Pas Uwa Wardi wan Uma Marianah rami bapandiran, kadangaran urang mangatuk lawang, lalamatan kadangaran urang mambari salam.
“Assalamualaikum.”
“Waalaikum salam,” Uma Marianah wan uwanya badarau manyahuti, salajur mambuaki lawang. Sakalinya Uma Sapri lawan dansanak sidin, Sapri ada jua di balakang mairingi.
“Naikkan barataan. Ayu dudukan. Uma Marianah manyuruh kula-kulanya Sapri.
Marianah bahinip di juruk kada kaluar lagi.
***
Uwa Wardi badaham, balalu ai sidin bapandir.
“Nangapa habar, sampian barataan bailang ka rumah kami.”
“Kami ni ka siaan manulusakan hajat Sapri. Inya lawas hudah bapadah, tagal nang ngaran musim bahuma kami kada kasawatan bailang. Nangaran abah Sapri hudah maninggal jadi kami ai nang manggantiakan ka sia.” Dansanak Abah Sapri bapandir.
“Hi ih, mun damintu kami dangarakan nangapa habar sampian barataan.”
“Kayainilah, Sapri ngini hudah lawas patuh wan Marianah, inya bakahandak mudahan Marianahnya hakun.” Marigap dada Uma Marianah, “Akayah ai, pacangan bamadu saku Marianah ni.”
Marianah di juruk, mandibar jua mandangar, himung inya hampai ka bumbunan.
“Kita ni lah sahibar manarimakan haja, si Marianah jua ampun kaputusan. Umanya Marianah batakun hulu lawan anak sidin. Tagal kami ni handak jua batakun, jar habar, Sapri ngini hudah jua kawin.”
“Damini kisahnya, Sapri nangini baisi kuitan angkat di Banjar. asalnya inya umpat manyiwa di rumah sidin, nangaran Sapri ni baik wan rajinan, diangkat urang jadi anak. Sapri dijuduhakan lawan kuitan angkatnya di Banjar, Sapri asalnya kada mau, bulik inya ka banua, tagal kuitan angkatnya mandatangi, maambili. Kabalujuran, sakalinya bibiniannya nang dijuduhakan wan Sapri kada hakun pas tahu Sapri ni anak angkat haja.”
“Uh, daminu ah, mun kayaitu kadada halangan ai. Ni Marianahnya haja lagi, hakun kadanya. Dihiyaukah atawa umanya haja manakuni?” Uma Marianah badadas ka juruk mandatangi marianah.
“Marianah, mandangar kaluku pandiran uwanya Sapri?” Marianah baunggut. “Han, mun mandangar kayapa ikam? Hakun haja kaluku.” Marianah batunduk, kada manyahut. Uma Marianah asa takurihing maitihi kalakuan Marianah. Sidin balalu mandatangi Uwa Wardi, urang pina rami bapandiran ka hulu ka hilir kada manantu.
“Kacamapa, hakunlah Marianahnya? Kita kada bangalih-ngalih, amun kaduduanya akur, batantu haja pabila arinya.” Uwa Wardi basuara.
“Pinanya bibiniannya hakun Wa-ai.” Uma Marianah manyahut.
“Nah mun damintu, pas banar. Dimapa, barapa jujuran. Nyaman kami sapadansanakan mandangar.” Uwa Sapri manyahut.
“Kayainilah, amun jujuranan, asa kada cucuk lakunnya manyambat, sakampuan Sapri haja, kami tahu haja, pian kayapa, kami kayapa, jadi sagan aruhnya kita tanggung basamaan, amun jujuran sagan manikahnya biar ha Sapri wan Marianah nang mamikirakan.”
“Kayapa Sapri?” Uwa Sapri balajur batakun.
Sapri takijat jua ditakuni, inya tadiam satumat lalu manyahut, ”Ulun ada-ai Wa-ai manyiapkan duit hudah sagan jujuran. Kaina ulun baastilah batamu wan Marianah. Ngini salajur balarangan ulun ada manukarakan cincin, mudahan sadang di jariji Marianah.” Sapri maunjuk cincin nang bawadah habang wan umanya Marianah, salajur duit jua baampluk, kada tahu barapakah isinya.”
“Mun damintu akur banar kami. Tinggal kita bacucuk ari haja lagi. Pabila nikahnya? Pabila aruhnya? Atawa nikah wan aruh tu baimbai haja. Kayapa umanya Marianah?” Uwa Wardi batakun. Lihum Uma Marianah, dasar harat jua Nini Iwar.
“Ulun tasarah pian barataan haja. Mun bulan dihadap ngini kada bataha sawat, napang parak bangat ari raya kurban, sabubulankah imbah ari raya, nyaman jua sawat basisiap. Manjamur, mamabrik banih jua. Nangka sawat jua ganalan kawa jua diputiki sagan manggangan.”
“Iya ai jua, kami gin damintu.” Uma Sapri umpat jua manyahut.
Malam ngitu diputusakan, Sapri wan Marianah manikah salajur aruh hidup dua balas bulan Muharam 1436 H.
Saminggu balarangan, kalihatan Sapri singgah di halaman rumah Marianah. Imbah bulik maajar di SDN Pulau Tambak. Marianah baancap mamakai jilbab, maitihi muhanya di caramin, bapupur wan bacalak mata.
“Marianah, lakasi, tu nah Sapri di ambin mahadangi.” Suara Uma Marianah sing nyaringan. Sapri duduk di ambin. Babaya Marianah kaluar, takurihing Sapri. Hanyar ngini pulang inya malihat Marianah. Pina bungas banar bakal bininya nangini. Marianah makaam batunduk, napang mun parasanya kada mangaruan. Galugupan kada sakira.
“Ding, batunduk tarus ha, kaka handak bapandir nah.” Makinannya Marianah batunduk.
“Ding, Kaka ni handak batarima kasih wan pian, hudah hakun mahadangi Kaka, jar habar racap urang badatang, tatap haja pian kada hakun. Alhamdulillah, mudahan pian ihlas mahadangi kaka ni.” Hanyar Marianah maangkat muhanya sadikit, kada wani jua cangang bahimat wan Sapri.
“Inggih ka ai, kada papa, ulun yakin haja wan kahandak Allah Ta’ala, uma haja nang manyanyarik, sawat dimandi’i sidin, kaluku ulun kana pilanggur jar.” Lihum Sapri.
“Napa pian kada bapadahkah wan uma, kita hudah bajanji?”
“Ulun kada wani ka ai, jar habar pian handak nikah pang, kaluku kita kada bakajadian supan ulun.” Sapri baunggut mambujurakan pandiran Marianah. Dasar bujur pang, imbah lulus kuliyah, kada wani inya badatang napang mun kadada pancarian. Batuhuk mahunur jua, untung pas urang panarimaan PNS inya bulik ka banua mandaptar, Alhamdulillah lulus.
“Ding, ni Kaka ada mambawa duit, sagan pian batutukar, barangai, baju salambar, salup jua atawa pupur mamupur, ulun kada mangarti, babisa-bisa ai pian mancukupakan.” Sapri maunjuk duit baampluk wan Marianah. Kada lawas imbah ngitu Sapri bulik, Marianah mantipur ka dalam rumah, supan bangat inya dilihati urang.
“Kada diulahakan banyukah, Si Sapri tu?”
“Bulik dah Ma ai.”
“Hau, lakasnya. Napang ti dipandirakan?”
“Inya manunjuki duit banarai, jarnya sagan batutukar.”
“Pas bangat tu isuk ari pasar, nyaman salajur batutukar.” Uma Marianah manjihing. Arai bangat sidin, kawin jua Marianah, anak sidin nang panuhanya.
***
Muharam hidup dua balas, rumah Marianah bahindang bahindala, rami kada sakira, hibak urang sakampungan lawan pulang kampung subalah manyubalah, saruwan Uma Marianah sing banyakan. Pas urang baninikahan, cipras-sipras uma Marianah mamaus hingus, banyu mata kada baampihan barubuian, Marianah gin isak-isak basisigan, napang kaingatan kuitan lalaki kadada, inya dinikahakan Uwa Wardi. Ading Marianah nang baampat tu gin manangisan, asa kada asap malihat Marianah nang bangkak mata manangis haja.
“Ding!” Sapri mahiau bininya bagimit. “Kada jadi kaluku lih kana pilanggur?”
Marianah mangibit lakinya di pinggang. “Pian ni talalu bangatlah. Lawas ulun mahadang, untung kada tahadang buah bungur. Cakanya pian kawin pas bangat ulun tu disambati kana pilanggur.”
“Ingatai luku papadahan H. Suhaimi, guru kita baari, pilanggur ngitu mitus haja. Mun urang kada kawin-kawin tu Ding-ai, juduhnya banar-ai baluman tatamu.”
“Umai lih pangantin ni galamisikan, nangapang dipandirakan?” Mandarau kakawanan Marianah manawa’akan pangantin nang kasisipuan.
Sasain siang, saruan sasain saikit, tunggal ikungan urang bulikan. Kamarian, lalakian, bibinian bajurut datangan mangganii basisimpun. Lalakiannya ba-a’angkat kursi mija, marubuh tinda, jua palaminan. Bibiniannya maulah bubur habang, bubur putih sagan basalamatan mahanyari kalambu pangantin. Lapah kada tarasa, napa mun gawi sabumi, tulung manulungi.
***

(Amuntai, 30 Oktober 2014)