Cerita Dalam Bahasa Banjar Tulisan Angah Samsi Amri

Kisah gasan mandarasi basa Banjar wan hijaan nang nyaman di baca.....

Tadalak

Pabila ari mamulai sanja bilang hinip pang sakampungan marga ada habar hangat Hajah Masitah mati jadi hantu ujar. Hanyaram dua malam hidin di kabumi akan di tanah pakuburan kampung tutih.Lamun habar urang cakada magan di dangar ,jar hati mawi jaguan kuntau nang suah ta umpat wayah mamarangi cina kominis di Sungai Manik awan Balun Bidai bahari.

"Asalamualaikum,cagar kamana garang Mawi basasanjaan kadamia" rawa si Emoh bila talihat kalibat mawi lalu di hadapan rumah hidin. "Asalamualaikum wbt Kamanang lagi kak ay mun kada ka rumah puang di pinjung tuh,bacara amanat pang di turutakan ai nah" sahut Mawi hangkui ha siwara. "Umayalah Mawi wani haja lah manguringi rumah puang tuh manyaurangan,kaluko ah" sambung Emoh ka anu Mawi. "Cah napang nang di takutanakan kak ay,wayah paparangan dahulu 10 ikung cina kominis gin ku sumbalih nia pulang ah mun baya hantu panjadian tuti ha" sahut Mawi sambil mambujurakan andak kumpang parang bungkol bagalar kajang rungkop nang ba tangkitan di pinggang Hidin. "Inggih banaran ay nintu satru Mawi ay, tagal mun Hantu cakada kawa di timpas-timpas kada sarana ah basabil mamalami rumah puang tuti bamalam ha di sia nah" saran Emoh ka anu Jaguan Kuntau. "Cah Cakada andika tahu ay kalu pantang katurunan mun duga di galari urang pamburisit......Ayuha amun bujur andika arwah Hajah Masitah ay mati jadi hantu dapati aku malam ni napa pang" sahut Mawi sambil mandabik dada tanda urang wani napa.Bah bilang batuhuk jua Emoh ma uyun Mawi sakira jangan bamalam di rumah puang ta sambat,lamun Mawi magunai bakaras indah tih pang ujar.Siapang nang kada pinandu lawan si Mawi tutih jaguan kuntau salagi taguh awan pilur,wani,karas pulang tuh pahatian.

Rumah puang ta sambat rumah pusaka arwah paninian hidin(Mawi) wayah arwah Kawitan hidin hidup sawat ba umanat mun hingkat jangan di sia-sia akan pang rumah tuh banyak banar ganangan ujar. Rumah ganal kayu produk zaman British bahari di rumah tu pang Mawi sapa adingan di ganalakan jauh jua malaran andak nya dalam kabun gatah sapamadaran nasi hanyar lacit mun tumatan di rumah Emoh tuti.

"Di napa tu ay bacara ikam bakaras jua handak mamalami rumah tu,ku doa akan bahara ay di ikam basalamatan haja Mawi ay" jar ucap Emoh ka anu Mawi. "Insha Allah kakak ay ,aku ba isur dahulu nah" sahut Mawi sambil malangkah maninggalakan halaman rumah Emoh.Ari sasain kadap tanda sanja parak ba ahir.Hampai di rumah tutih Mawi malikiti lampu minyak gas kalambu gin di gantung hidin.

Sadang Mawi bahayal malayani pikiran kanapa maka parut tarasa sakit tanda handak malapas marga kabanyakan makan gangan pupuyu awan pisang manggala siang tih kalu ah,Jamban Pambahiraan tih jauh jua malaran andak nya di balakang rumah di atas parit nang di kulilingi rapun bamban.,napangada ah kacampulangan am hajanan Mawi luruh ka parit. Mawi nang rahatan mahajan balajuran ta sintak pabila ta dangar siwara di hadapan hidin......."Oh Mawi Ikam kapingin badapatan lawan di aku kalu tih" sabigi kaya siwara Hajah Masitah kutika hidup.Pina kakancawai ha tangan handak marapati Mawi. "Hikamam nah mun dintu bujur jua tu dika ni mati jadi hantu" jar hintatak Mawi sambil mandahut ka parang bungkol kajang rungkop,"Napa garang ilmu nang andika pakai wayah hidup ,malalain haja tih gawian ,kaya apa habar di Akhirat ?" jar Mawi manumpalak ka hantu Hajah Masitah. "Rat....Rat...Rat ....hehehehe,hahahaii" jawab hantu Hajah Masitah pina mauluakan ka Mawi. "Hadang dika lah nah" Timpas babujur,rawis ka kanan.ka kiwa. "Ooo jadiam tuh Mawi ay napang bapanat-panat caka ka sia ha nah kita bagayaan lagi rami .....hehehehe" sahut hantu Hj Masitah sambil tatawa panjang. Bunyi siwara tatawa tuh pang nang mampiulah Mawi asa tadalak gilir nih bumi di jajak asa ba ambul,parang di timpasakan kada mambari bakas.Ayungan nya Mawi badadas bukah naik ka rumah lansung mancirup babuat ka kalambu.samalaman maning balukup di bawah tilam buruk ,burit gin kada sawat babasuh,tewas siapang manyuruh manantang Hantu Panjadian....

Isuk nya manyubuh Mawi hudaham sampai ka rumah Emoh. "Tadalak gilir nih aku kak ay,dasar banaran Hajah Masitah mati jadi hantu,bujur jar andika Hantu Panjadian kada magan di tantang,di lalawani" habis di kisahakan Mawi tuamat A hampai z ka anu sapupu hidin Emoh.
"Han napa tia tutu pang akibat nya amun talalu wani tih Mawi ay,jadi kaya apa am burit tuti di basuh jua ah hudah" takunan Emoh lagi manambahi barau di hati Mawi

Nukilan Tuan Samsi Amri (Guru Utama Kuntau Banjar)