Carita Rakyat Banjar: Datu Kuning Buhaya Kalua

Carita Rakyat Banjar: Datu Kuning Buhaya Kalua
(Buku Putri Junjung Buih, karya Syamsiar Seman, Lembaga Pendidikan Banua Banjarmasin, 2006)

Ujar nang ampun kisah, wayah bahari ada saikung bibinian di Banua Kalua batianan lawas bangat. Sudah ganap tian, sangang bulan sangang ari, balum jua tanda-tanda nang inya handak baranak. Parutnya sudah batambah buris bangat, nang urang mangira musti kaina amun baranak bisa kambar dua atawa talu ikung anaknya.

Sasakalinya imbah tian bibinian nitu parak duawalas bulan, balalu ada tanda-tanda handak baranak, parutnya sakit kada sakira. Wayah tangah malam, sakira pukul sawalas bibinian nitu sakit paarut. Bubujuran jua, inya baranak dua ikung anak. Nang saikung anak lalakian, tagal nang saikung lagi kada anak manusia, inya anak buhaya. Anka buhaya nitu ganalnya sama lawan anak lalakian. Jadi, anak lalakian nitu kambar dua lawan anak buhaya.

Amun anak lalakian nitu biasa-biasa haja, tagal anak buhaya nitu sudah bisa bakurayap ka padu. Inya turun pada rumah, tarus bakunyung ka batang banyu nang ada di balakang rumah nitu. Jadi, anak buhaya nitu sudah bigas, kawa bakunyung, timbul tinggalam di banyu.

Ujar nang ampun kisah, naka buhaya nitu wayah-wayah apabila tangah malam datang ka rumah nitu. Inya inta disusui uleh umanya. Asal mulanya, umanya takajut pang. Tagal imbah sudah babarapa kali kada takajut takutan lagi.
Abahnya, umanya lawan dangsanak-dangsanaknya nang lain sudah tahu apabila anak buhaya nitu handak datang ka rumah, inya mambari tanda.

Balalu dibuka akan haja lawang di padu, gasan anak buhaya nitu masuk handak manyusu.

Imbah sudah bajalan talu ampat tahun, anak buhaya nitu sasain baganal. Inya sudah jarang datang ka rumah nitu. Awaknya sasain ganal, sasain panjang, balalu balangnya baubah jadi balang kuning.

Ujar kisah, buhaya nitu sarik amun disambat Buhaya Kuning, amun sarik inya bisa manyambar manusia.

Bubuhan tutus kulawarga nitu manyambat Datu Kuning. Amun wayah ari hujan panas, Datu Kuning nitu bisa timbul di batang banyu. Urang kampung takutan bangat ka batang banyu amun wayah ari hujan panas.
Tagal kulawarga bubuhan tutus kada takutan, sababnya Datu Kuning nitu bubuhan kulanya sampai salawasan.

Gunung Amas Bamata Intan
Imbah tahun kalawan tahun, kulawarga buhaya nitu rupanya kalumpanan lawan buhaya nitu. Maklum haja pang, sudah dua talu katurunan lawasnya, lawan haur pulang lawan gawian ari-ari.

Malam ari nitu sakira pukul duawalas, kulawarga rumah nitu gigir gampar. Saikung lalakian tutus kulawarga nitu kana kapingitan. Inya kada sadar batiharap di lantai ambin rumah, bakurayap, malancar banganga nang kaya urang kalaparan handak makan. Imbah nitu lalu baucap ‘gunung amass bamata intan, gunung amas bamata intan.’

Imbah mandangar ucapan nitu, kulawarga nitu balalu ingat. Inya sudah kalumpanan mambari makan Datu Kuning. Datu Kuning nitu musti dibari makan sakali satahun lawan ‘gunung amas bamata intan’.

‘Gunung amass bamata intan ‘ nitu maananya nasi lakatan kuning nang diulah kaya gugunungan. Mata intan nitu maananya adalah sabigi hintalu masak nang diandak di atas nasi lakatan kuning.

Kulawarga tutus nitu balalu balakas-lakas mamasaki nasi lakatan kuning lawan hintalu masak. Malam nitu jua ‘gunung amas bamata intan’ nitu dibawa ka balakang, di batang banyu dimakanakan lawan Datu Kuning.

Kulawarga nitu kada rasa takutan mandapati buhaya nitu, sabab Datu Kuning nitu datunya jua, bubuhannya jua. Imbah Datu Kuning dibari makan, maka angguta kulawarga nang kana kapingitan nitu situ sini bigas nang kaya biasa pulang.
Imbah kajadian ada nang kana kapingitan nitu, maka kulawarga tutus Datu Kuning maingatakan tarus tiap tahun, jangan sampai kalumpanan mambari makan Datu Kuning lawan ‘gunung amas bamata intan’.

Wayah-wayah sasala tahun Datu Kuning biasa jua datang. Ujar tu inya datang bailang, sabab dandaman lawan kulawarga tutus. Inya datang mambari tanda. Balalu di rumah kulawarga tutus diadakan salamatan manyadiakan ‘gunung amas bamata intan.’ Makanan nitu bisa jua ditambahi lawan hinti, cincin , cucur, ditambah lawan pisang mahuli. Apabila Datu Kuning sudah datang, dibacaakan du’a salamat, tarus makanan nitu dimakani baimbai sabarataan.

Ujar kisah, bubuhan kulawarga tutus kawa haja maliat Datu Kuning nang ada di situ. Tagal nang lainnya kada tamasuk kulawarga tutus, kada kawa maliat Datu Kuning. Sudah barapa tahun lawasnya katurunan kulawarga nang maharagu buhaya nitu, ujar kisah, lacit sampai wayah hini, Datu Kuning nitu pagun haja inya hidup di sungai Banua Kalua. Wayah-wayah amun ari ada hujan panas, Datu Kuning nitu timbul satumat batampai di atas batang banyu.