Angah Samsi Amri Magisahakan Kisan Barambangan

Kisah kita arinih gasan mandarasi basa warisan paninian...

BARAMBANGAN

Tihang istana bahagia nang sasamaan di cagatakan atas dasar cintan antara Azmi awan Jamilah hudah mamulai ba inggul,kaduanya magun anuman hanyar ba anak saikung lalaki dua tahun.Azmi anggota Panguat kuasa Dewan bandar raya,Jamilah karani di sabuah firma syarikat Pambinaan bapangawak bungas ,putih mampilak,ada irasan kaya palakun drama Fasha Sandha....Poh mun hudah babingking cakada di sangka ham pada sidin hudah ba anak saikung,alamat mambarangat tih pang bubuhan nang bagalar Utoh aur sakilar-kilar tantan marga kada tuhuk maitihi....Parian nya di wayah 60 an bahari pisen cariritan pang tinghui higa mahiga tanda maulur tantaran unjun sambil marasa akan garujut nya...Angkara kasayangan awan bini tuti pang Azmi sanggup manurutakan napa haja sarabanya kahandak si Jamilah walau tapaksa bapapai kaduit siling.Salah si Azmi jua pahin bacicintanan bahari katuju banar ma arai akan kaharatan ka bibinian,macam panduitan banar,sarabanya pakaian nang bajanama tantan ,matukah,pakaian ,cap hayam kada main am.Napangada ah pabila hudah batanggungan kadamia hanyar ta rasa bakipoh kada nya,si Jamilah tih pulang mantangan laki panyayangan sasain baiya batagihan itu ini.

Panguatkuasa nyata pang bakuasa,nang babujur lalu nang bahalang patah,mantangan bakuasa tuti am si Azmi bilang kada ma ingat baramu,baik kasalahan halui sampai ka nang ganal,asal kapap pakit samunyaan hingkat kawtim,amun baya maharap gajih bulanan ha barapa duit banar,alamat kada tarasa pang saumuran mamakai matukah Toyota Altis,marga katalaluan ma untal Azmi hudah babarapa kali kasadakan,baik jua hingkat haja lagi di papa-papai,walau hudah suah kasadakan tuti canangan bisa ba apik magin pa iya an ada am,ai bacara urang bakuasa kalu!

Bulan kada nanar hibak,Azmi ba asa kabungkalan atas papadahan katuha atasan sidin tapaksa mamilih anatara dua....mahadapi Mahkamah atawa malapasakan jawatan sacara ta hormat,Panyudah nya Azmi tapaksa akur tapaksa manyangkutakan unifom Dewan Bandaraya gasan salawasan.Mamarakani ma anam bulan Azmi kada napa ulahan,bilang batuhuk hudah bacari gawian situ sini , ba tamu duga kayina hadangi jawapan ....ujar ! Duit simpanan bamula ting ting talinga warek,matukah mandua bulan kada ta tahuri ansuran bulanan,rumah dintu jua. caka kada Jamilah ba tulak ansur pancang mangaruruk pang parut lilit saku.Hagan manambahi kikiwangan si Jamilah tapaksa maulah gawian sambilan maumpati kakawanan badagang jualan langsung tulak bagawi kadap,bulik gin kadap lamun pakulih magunai kada mayu gasan sahadanya.

"Parian nya aku bagawi Pangawal kasalamatan pahadangan ta ulihi gawian nang lain di mapa am Yang,barangai ada jua pakulih barang sakupang dua,pada baranaian kalakun nia,matukah tu kita tawarakan ka kakawanan nang sanggup malabuni kalu hingkat di aku ta ulihi sabigi moto kapcai tapakai .jadiam hagan tulak bulik bagawi" saran si Azmi ka anu nang bini.

"Kada ,kada rigi aku balakiJaga ,kamanang handak ma andak muha,supanan mun katahuan kula warga,kakawanan palian,maraha mun nya cagar lanah baik lanah ha sakakali" Pina mangurincang hangkui siwara Jamilah manyahuti ka anu nang laki.Cakah.

"Ai umai napa pina lain banar kuyaan di ikam Yang.....walau dimapa gin kita kana manarima hakikat....Banyu kadanya titir landas,banahu pasang bahanu pandit ....damintu pang jua kahidupan mun taka bawah kadamia bagigimit ai kita bakayukut ba asa ....kada tahu ai dudi kita taka tabing ha pulang" Gulok si Azmi mamadahi nang bini.

"Indaaahhhh ....aku cakada sanggup mahadangi buah kaminting pacah saurang....Imbah kita bawa haluan papasing nya nyaman ranai garutuk" Hintatak Jamilah sasain wani durhaka ka laki.

Ayungan nya Azmi hudah pagat harap,nyata si Jamilah cakada kawa di bisae ,di guloki ,sasain manahapi huwal ada am.Tamandam si Azmi mangganang nasib,bini nang di sayangi bahimat ibarat mananting cawan gatah wayah ba putik di pamotongan rupa nya pukal kaca haja pang...Cintan maut nangapa kuang mun kalakun nia.

"Amun hudah dintu kahandak di ikam,ayuha kita bapisah pahadangan ,tagal aku kada manalak di ikam lah,maraha aku malangkah pada rumah ni awan doa jua harapan mudahanai di ikam baugah pikiran dudi,aku tatap mahadangi,sabuting pinta ku ,haragu anak kita sabaik nya Jamilah ay" Garunum si Azmi sambil bakumbah mambuati silawar baju,sahadanya kadalam kampil.Jamilah ranai mambatu kada sing bunyian lagi.

Salawas barambangan si Jamilah sasain cinit ,anak halui di tinggal di rumah kawitan,rumah hagan panyingahan satumat jua kaya hotel di ulah nya,sidin bebas kasitu sini bahanu ada nang kada suah guring di rumah bahayau tantan,auran wan gawian salagi ada bisnes pulang,sunggoh damintu tih tatahuri haja ansuran matukah ,rumah cakada maharai bacara urang saing bagawi pang lahai.

si Azmi nang mandarita nasib bulik ka kampung ba ulit lawan kawitan ba asa ma igalakan pisau gatah ,manyandang tong racun,Cah cakada kisah Azmi ay asal gawian jadi duit.....Penyaa Paang!

"Caka ku tahu kaini rami ,nyaman nya hudaham lawas aku babini" jar hati si Halim 30an nang asa kada sabar lagi cagar badapatan awan si Jamilah(magu bini urang) wayah bulik bagawi patang tuti.Sidin nang magun bujangan bilang manujuh tahun hudah bagawi di sabuah jabatan karajaan di jalan duta,Marga kada pati bisa bakawan katuju manyaurangan tutu pang saku jadi hampai damini kada taulihi jodoh ,bagana di rumah sewa di pinggir kota .

Patamuan nang kada diduga di satu patang sabtu.......si Halim nang rahatan auran mangusuki matukah kelisa kasayangan di muhara rumah nya
di datangi leh Jamilah nang rahatan badagang jualan langsung sarabanya produk.Halim nang pamugaan kada pati mahirani awan kuyaan bisnes si Jamilah bamula asa kapingin pabila si pangawak langkar ma arai akan sabotol cairan panyambur gasan mambarasihi ruang dalaman matukah,napang kada sarana bangangalih mangusuki ,mayu sakali sambur jua hudaham mangkining bakilat saurang nya.Rahatan Halim manarai cairan ta sambat.....Ari nang hudah saharinan maram basadinan hujan sing labatan lawan kilat guntur kaladuman palian....mamaksa si Halim badadas babuat ka dalam rumah,tatangga nang lain hudaham sintup barataan.Jamilah magunai tacugut di muhara lawang Halim manahani tampias,Halim pulang tarasa saraba salah di hija akan asa maras,di bawae masuk ka rumah tia ba asan an.caka hudah babini kada jadi pasihul.

Kilat nang sadang cirarapan balajuran......Daguiii siwara patir saling hangkuian .....Jamilah nang katakutanan basadinan mancapil ba buat ka dalam rumah.

"Aku umpat bataduh lah,hujan ribut nih dimapa nah"Jar siwara pangawak bungas bapadah ka anu si ampun rumah.Halim si utoh panyandu cakada bisa manyurung pandir,hingga nya kawa ma angguk banarai bilang si Jamilah ay nang barancap takunan itu ini,Sidin nang hudah ba pangalaman kawa manduga marga si jambulita nang saikung nia cakada suah manjuhara saumuran tukoh nya. si Jamilah sasain wani balinjang dalam rumah tuti angkara katahuan nya si Halim magun bujangan manyaurangan.Hujan di luar magunai baluman ada tanda-tanda cagar taduh.Tantaran unjun hudah di huyungan leh Jamilah tinggal mahadangi garujut nya jua am lagi....Ari bamula kadap ,si Jamilah sawat haja ka dapur mambancuh kopi 0 hangat Bah matan kada asa an kaya rumah saurang pang di inda akan nya, Si Halim bamula asa rami gilir nih di kawani leh saikung umat nang bagalar bibinian napa. Mambadai ay malam tadi aku ta mimpi di sambar halilintar.....kali nya patanda bulan cagar gugur ka asuhan pang bisek hati si Halim sambil mangilar cuntan ka pangawak mungkal si Jamilah.ampih rasa galudupan ,langlam asa supanan,jarigi sasain kakariweh kapingin manjapai......ai naluri lalakian kalu!

Duuummmm......ayungan nya sang halilintar banaran kaya handak mambalah bumi.....sambaran elektrik statik gilir nih mampiulah pancawangan TNB kada ta daing labaram kadap sawadahan black out napa kah jar sambatan nya....Si Pangawak bunggas .nang lawas hudah puasa basadinan marungkup ka anu si jambulita bapiragah katakutanan....Nyata kada sia-sia tantaran unjun mangarujut sudah lului am sahadanya .....walau si juragan malam hanyar pamugaan mangamudi kapal ,lamun galombang ombak lautan dalam ta duga haja,matan kada di sangka ham ...kapal tarus maluncur laju manuju lautan dalam salamat malabuh sauh di pulau kapok,Nuri di tangan kada ku lapas jar hati Jamilah pahadangan kapal balayar ba asa.....

Imbaham bajadian....samalaman maning di rumah Halim tutih pang mampiulah kadua nya nyanyat bilang kawa ma alahakan pangantin hanyar,cilakoi bangat! bujur kada kawa tahayut kada bakiraan wadah lagi bahanu bagilir rumah papasing nya,kapalipitan banar dalam matukah gin jadi haja jua.....umay katalanjuran lahai.

Angkara talalu bahimat ba unggat apongan tia mambangkak jua ai paparutan ,muriat dingin am pangawak si Jamilah,handak mambawai Halim awan ikatan nang sah di mapa pulang,tewas salah saurang jua napa maka bapiragah magun anak dara ka anu si Halim.....Rigi kada nya tapaksa ai batarus tarang marga katalanjuran tuti ka kawitan.

"Aku babanyak minta ampun ,pinta relai ka anu andika,marga aku pang jadi dika madarita nasib kadamia,aku bajanji dunia akhirat ,imbah ni aku indah pang bapisah awan andika lagi,hudah marasani kaya apa azab nya hidup manyaurangan......aku bini durhaka.....banyak badosa wan andika....aku kapingin ba bulik ka pangkal jalan bang ai,bahara ai lawang hati dika magun bahangapan gasan manarima insaf ku" jar rayu marista kapiragahan Jamilah ka anu nang laki Azmi kutika baduhara sapakawitan an mailangi rumah kawitan Azmi di felda sg retang ,Jerantut,Pahang.

"Babulik ha Mi ay ...di ganang anak....si Jamilah gin hudah insaf ma akui sagala kasalahan nya,ba asa ha malingkang manuju panghidupan hanyar,buang nang karuh cibuk nang jaranih" kuya ayah si Azmi mamadahi nang anak,sabujuran nya hidin kada tahu kisah di subalah kalambu .....kasian hidin....dinapa tu ai.

"Imbah ni mun bulik ka KL kada sarana lagi di ikam bangali-ngalih bacari gawian,abah hudah manukarakan di ikam sabuah kadai kopi intang Greenwood,soal modal baniaga jangan di hitung kayina abah saurang nang manduiti nya" kuya ayah Jamilah mintuha Azmi manguloki sidin.cakada tahu magun ada tantaran unjun di atas banturan.

KADAI MAKAN JAMI Akhirnya ba oparasi .....Alhamdulillah mandapat sambutan hampai damini.Jamilah salamat ma ranakakan anak nang ka dua bibinian......Bah suka nya si Azmi satimang-timang ham kasayangan wan anak.......Tagal hadangi nang dudi lah sapa garang nang mawali akan anak tu kayina....cagar tumbar paloh ai di ikam pulang Azmi ay....

Barilaan Sabarataan

Tulisan Tuan Samsi Amri